Daga Abubakar Rabilu Gombe
Asusun Kula da Kananan Yara na Majalisar Ɗinkin Duniya (UNICEF) ya bayyana damuwarsa game da ƙarancin haihuwar da ake yi a cibiyoyin kiwon lafiya a Jihar Bauchi. Cibiyar ta ce kashi 30% ne kawai na haihuwowi a jihar ake gudanarwa a cibiyoyin kiwon lafiya, yayin da mafi yawan su ke faruwa a gida.
Shugabar UNICEF a Bauchi, Nuzhat Rafique, ta yi wannan jawabi ne a taron shekara-shekara kan Kiwon Lafiya na Farko na Jihar Bauchi wanda aka gudanar a Gombe. Ta ce yawan mace-macen mata masu juna biyu, jarirai, da ƙananan yara yana ƙaruwa duk da irin ƙoƙarin da ake yi wajen inganta kiwon lafiya a jihar.
Ta bayyana cewa haihuwar da ake yi a gida ba tare da kulawar jami’an lafiya ba tana ƙara haɗarin mace-macen uwa da jarirai. Ta ce ya dace a tabbatar cewa haihuwa tana faruwa ne ƙarƙashin kulawar mata masu jinyar haihuwa, nas-nas, ko likitoci don rage haɗarin mace-macen da za a iya kauce wa.
A yayin taron, an jaddada cewa matsalolin rashin isasshen rigakafi na ci gaba da addabar wasu yankuna a Bauchi, inda ake da yara da ba su taɓa samun rigakafi ba. Rafique ta ce wannan batu yana da muhimmanci saboda rigakafi haƙƙin yara ne da ya kamata a tabbatar da shi.
UNICEF ta bayyana cewa ta ware kashi 53% na kasafin kuɗinta na 2024 don tallafawa harkar kiwon lafiya a Jihar Bauchi, tare da ci gaba da aiki da gwamnatin jihar don magance matsalolin da ke damun fannin kiwon lafiya.
A nasa jawabin, Mataimakin Gwamnan Jihar Bauchi, Mohammed Jatau, ya tabbatar da cewa gwamnatin jihar tana mai da hankali sosai wajen inganta kiwon lafiya. Ya bayyana cewa binciken NDHIS na 2023 ya nuna alamar ci gaba, musamman wajen ƙara yawan yara da aka yi wa rigakafin Penta 3 daga kashi 31% zuwa 58%.
Haka zalika, Jatau ya gode wa masu bada tallafi kamar Gwamnatin Tarayya, Gidauniyar Aliko Dangote, Gidauniyar Bill da Melinda Gates, UNICEF, da WHO saboda gudunmawar da suke bayarwa wajen inganta kiwon lafiya a jihar.
Saleh Aliyu